Vittorio Ingegneri – Fragmenta

Pubblicata su:
Quatro Ciàcoe nr. 5/2007

Sento la ghe ne pensa e sento la ghè ne scrive. La xe un vero e propio vulcano Maria Luisa Daniele Toffanin che continua a spuare fora incandessense poètiche, tanto de armoniosa letura quanto de inpegnativa interpretassion.

Questo xe el caso de la so ultima (se fa per dire) publicassion Fragmenta, un sinpàtico volumeto de 125 pàgine in dignitoso formato tascabile, stanpà da La Grafica Editrice e Stampa Sri de Vicenza per conto de Marsilio Elleffe de Padova. Un titolo de arcaica concession che crea sicuramente curiosità inteletive, invitando el letore a la non fàssile scoperta de un lirismo lessicale rafinà concepìo traverso el predominio de valori etico-morali che sùssita emossion da pèle d’oca, spalancando i oci e la mente del letore su un orizonte inturbià da inquietanti interogativi.

Te sta òpera, tenpio de “archetipi” inpenetrabili, l’autrice desbroja un gemo sgropoloso e incatejà da un “kerigma” esistensiale ancora a primevi modèi de vita e de morte, de i quali le manifestassion sensibili de la quotidianità s’introsa con altre banalità papagalesche de basso livelo, prive de originalità. Un sentiero poètico, quelo inbocà da Maria Luisa, che se snoda lungo trosi iluminài da un inteleto non comune che sa de siensa e cossiensa.

Davanti un distinto pùblico che inpienava tuta la Sala Rossini del Cafè Pedrocchi, el prof. Giuliano Lenci, in rapresentansa de l’aministrassion comunale de Padova, ga espresso un caloroso pensiero de elogio a la poetessa per aver dimostrà co ‘l so inpegno leterario de saver spassiare per oscuri antri de celestiale saòre.

Secondo Luisa Scimemi di San Bonifacio che ga messo el so conpetente ocio critico su i contenuti de Fragmenta ga osservà che l’òpera xe un assenblajo lirico elaborà da na serie de framenti espressi con altissimo linguagio metaforico che sfocia in sentimenti emozionali evocanti una logica struturale quasi liturgica, propio come lassa sotintendere con sotile venadura de rinpianto “l’introibo” de classica memoria latina.

Quela che apare dal lavoro de Maria Luisa donca, come ga spiegà nel corso de la so dota presentassion el noto leterato Mario Richter, xe na mitologia comunicativa che, ne le so originali e molteplici assonanse de gualiva e organica costrussion, parla diretamente al cuore con condivision de sentimenti, conceto peraltro condiviso anche da le conpetenti note critiche de Luciano Nanni.

L’òpera, anche se apare al primo inpato, come na refuaja de rovine catasù e inmas-cià t’un organico sésto de frantumi, rinvia chi snasa tra le pieghe de i versi a un classicismo che per serti aspeti profuma anche na s-cianta de petrarchesco. Un libro che sarìa propio un pecà no poderlo gustare. E, par gustarlo, bisogna lèsarlo!